Ohna Broutwörscht get nex

"Ohna Broutwörscht get nex“
Mit der Bratwurst durch`s Jahr. Ein Gedicht in Neustadter Mundart von Hanne Büchner


Hanne Büchner, Mundartdichterin aus Neustadt/Cbg.
2005 © Ulrich Göpfert

"Ohna Broutwörscht get nex"


2005 © Ulrich Göpfert

Kaum tut im Frühjohr die Sunn a weng blitzn,
siehsta die Leut in ihra Gärtn sitzn

un dann brauchsta blouß in Qualm nochzugehn
un do siehsta a scho a Broutwörscht-Röstla stehn.

Mit Kühla un a weng Harthuolz – a schös Feuola drunto
bei dann Duft, wörd do größt Winto-Schläfo munto.

Imm Summo dou gibt`s Golechnheit gonug,
dou kaasta an fast jedo Eck a Broutwörscht vosuch.


Rainald Büchner aus Dörfles-Esbach
2005 © Ulrich Göpfert

Die E-in wolln sa blouß halbodurch gobroutn
ich mouch sa kuohlschwarz – ich tu`s blouß euch voroutn,

ich muss mir aa noch Semf draufmach,
ich wäß, für an Neustadto is des ke-i Sach.

Owo ich hoff, ihr könnt mir des vozeih,
dofür tu ich in a halba Samml halt 2 Broutwörscht nei.

Dann am Kinnofest is die Broutwörscht der Hit,
sugor im Ümzuch trouchn sa a drum Broutwörscht mit,

eine täuschend ähnliche Attrappe,
zum Aa-beißn schöi, aber leido blouß aus Pappe.

Wie fix is dann Herbst un die Kerwes-Feion fanga aa,
un dou steht aa die Broutwörscht widdo ganz vorna draa.

Desmol mit Sauokraut – des is a Fest-Assn für mich,
bsondosch, wenn es Kraut gut ougschmeckt un schö-i schlaagorich is.

Do Neustadto-Weihnachtsmarkt ohna Broutwörscht?
ihr Leut des war a Ding,
im Notfall müsst dou do Nikolaus an groußn Souck voul mitbring.

Ein dreifach Hoch, dann Maa, wu die Broutwörscht dofunna hot,
normaloweis ghört ja die Broutwörscht ins Wappen unnoro Stadt,

denn e-is steht fest, ob Dezember odo Mai
aa wenn da scho satt bist, a Broutwörscht passt immo nei.

Ich gläbb, des mich jedo jetzt vosteht,
des in Neustadt ohna Broutwörscht werklich nex geht.

Copyright © 2024 Ulrich Göpfert. Alle Rechte vorbehalten.
Joomla! ist freie, unter der GNU/GPL-Lizenz veröffentlichte Software.